«Кугарня» газет – «Марий Эл» увер агентстве»

🔹 Йошкар-Ола гыч фольклор коллективым вуйлатыше «ГОРДОСТЬ НАЦИИ – 2026» всероссийский премийын регион-влак кокласе этапыштыже сеҥен.

Мария Смирнова Йошкар-Олаште «Царев город» самодеятельный ансамбльым вуйлата.

Премийым российысе калык-влакын этнокультурный вияҥмашкышт да икоян улмыштым пеҥгыдемдымашке шке надырым пыштымылан кучыктат. Юл кундем федеральный округын этапше Киров олаште эртен.

🎭🌳 Йошкар-Олаште Российысе театр сообществын аллейже шочын

Кодшо кугарнян, 16 октябрьыште, Тӱвыра да каныме рӱдӧ паркыште Театр пашаеҥ-влакын ушемыштлан 150 ий темме вашеш ты сферыште тыршыше еҥ-шамыч погыненыт.

Артист-влак ден театр пашаеҥ-шамыч 30 утла пушеҥгым шынденыт, нунын коклаште шӧрва (ясень), пызле, каштан, пӱкшерме.

🌰 Пытартышыжым лӱмын урлан шындыме. Паркыште тиде изи янлык-шамыч ынде кок ий илат.

📸 М.Шкетан лӱмеш Марий национальный драме театрын тӱшкаж гыч налме фото.

Йошкар-Олаште СВО-н участникше-влаклан полшымо шотышто поро кумылым ончыктышо концерт лиеш

Мероприятий 23 октябрьыште 18 шагатлан В.И.Ленин лӱмеш тӱвыра полатыште эрта.

«Достойные потомки Великой Страны» концертым тӱвыра полатын коллектившын вийже дене организоватлыме. Билет деч оксам спецоперацийыш колташ гуманитарный грузым погаш пуат.

🔸Кумданрак – тӱвыра полатын лаштыкыштыже пален налын кертыда: https://vk.ru/wall-15235465_17416

🍂🚫🔥 Марий Элысе чодыраште пожар лийын кертме лӱдыкшӧ тургымым официально петырыме!

💬 Марий Элысе Пӱртӱс поянлык, экологий да йырым-йырысе средам аралыме министерствыште увертареныт: 2026 ий 19 октябрь гыч регионысо чодыраште пожар лӱдыкшӧ тургымым мучашлыме. Тений тудо 183 кече шуйнен – 20 апрель гыч 19 октябрь марте.

💬 19-23 октябрьыште Марий Элыште «Внимание – мошенник» оперативно-профилактический мероприятий эртаралтеш. Тидын годым полицейский ден мер пашаеҥ-шамыч калык дене вашлийын мутланымаш-влакым эртарат.

Ик тыгай вашлиймаш Оршанке посёлкышто Россий Социальный фондын пӧлкаштыже лийын – илалше-влаклан телефон да интернет гоч ондалкалыше-шамычын оптышышкышт кузе логалаш огыл манын палдареныт.

Эксперт-влак аферист-шамычын чӱчкыдын кучылтмо схемышт дене палдареныт да лӱдыкшыдымылык шотышто «шӧртньӧ правилым» ушештареныт: палыдыме еҥ йыҥгырта гын, кутырымым чарныман.

📸Марий Элысе МВД-н сайтше гыч налме фото.

🍁19-25 ОКТЯБРЬЛАН КАЛЫК ПАЛЕ

19 октябрьыште мардеж уке гын, йӱкшемдымым вучыман.

20 октябрьыште сай игече шога гын, тудо эше кум арнялан аралалт кодшаш.

21 октябрьыште кече воктене тӱтыран оҥго коеш – кукшо да ояр игечылан.

22 октябрьыште лыстанвӱнчыштӧ име кодын гын, тугеже лумат але лийшаш огыл.

23 октябрьыште огеш кылмыкте гын, телым ныл арня вучыман огыл.

24 октябрьыште тӱтыра вола гын, левыктышаш.

25 октябрьыште кечывал ден йӱд температур коклаште ойыртем кугемеш гын, игече сай шогышаш.

🐻📈 Пытартыш жапыште маскам ятыр илыме верлаште ужаш тӱҥалыныт.

Амалже кочкыш укеште огыл – нуно ятырлан шукемыныт. Российысе Пӱртӱс ресурс да экологий министерствын данныйже почеш, пытартыш 30 ий жапыште кӱрен маска 2,3 пачаш шукемын, сентябрьысе данный почеш 308 тӱжем ава маска ила. Тений эше нуно ятыр игым ыштеныт. Сонарзе-влак шекланеныт: икмыняр ийлан ик гана маска-влакын тыгай чот шуко игым ыштыме пагытышт лиеда.

Олимпиадылан ямдылат🔬

«Волгенче» рӱдерыште йоча-влакын агрогенетике ден биологий дене профильный сменышт лийын.

Тушто самырык шымлызе-влак научный практикым эртеныт да олимпиаде форматыште пашам ыштеныт.

Тунемше-влак тӱрлӧ нелылыкан олимпиадысе задаче-влакым решатленыт, аналитик семын шонен моштымыштым пӱсемденыт, решенийлан стратегийым чоҥаш тунемыныт. Нунылан туныктышо-влак занятийлам олимпиаде семынак эртареныт.

Ты сменыште пашам кок программе почеш виктареныт:

🔸«Секреты Иннагрики: От ДНК до умной фермы» – агрогенетике ден биотехнологийым келгын шымлымаш;

🔸9-ше да 10-шо класслаште тунемше-шамычлан биологий дене учебно-тренировочный сборы по биологии – всероссийский олимпиадыште ончыкылык сеҥыше-влакым ямдылымаш.

У НОМЕР 🍁

23 субъект гыч толыныт 💥

Йошкар-Олаште Туныктымо тӧнеж-влак коклаште сокыр-шамычлан спорт дене Российысе спартакиаде эртаралтеш.

Элнан 23 субъектше гыч 500 наре ӱдыр-рвезе тушко ушнен. Нуно иймаште, футболла, голболла, теннисла, шашке дене модмаште таҥасат. Спартакиаде 17 октябрьыште мучашлалтеш, палдара Марий Эл Республикысе Спорт министерстве.

📸 Марий Эл Республикысе Спорт министерствын архивше гыч налме фото.