Эльвира Мозаффар | Ирек мәйданы

Җәвит Шакировтан иммунитетны ныгыту серләре

Эльмира Хамматова: Туры эфир ярты чәчне агарта
Россиянең атказанган, Татарстанның халык артисты, профессор, сәхнә теле укытучысы, данлыклы телевидение дикторы Эльмира Хамматова бүген дә тынгысыз, көр күңелле, матур, ягымлы тавышлы ханым.
–Кызыгыз Айсылу шактый ерак яши, аның белән күбрәк телефон аша аралашасызмы?
–Әйе, хәзер заманча технологияләр заманы бит. Ерак араларны да якынайтырга мөмкинлек бирә. Кызым гел: “Әни, прогресстан артта калма”, дип тукып тора. Үзе IT белгеч. Оныкларым да зур инде. Алисә аниматор- рәссам, Даяна –микробиолог.
–Күпләр сезне “Бер күрешү - үзе бер гомер”, “Әйләнә сәхнә, әйләнә”, “Зәлидә”, “Җомга көн кич белән”һ.б. тапшырулар аша хәтерли. Туры эфирлар алып барганда нинди көтелмәгән хәлләр белән очрашканыгыз булды?
–Берсендә эфир вакытында лампа шартлады. Куркуымнан сүз дә әйтә алмадым, йөрәгемне генә тотып куйдым. Берсендә яңалыклар сөйләгәндә катлаулы сүзтезмәне әйтә алмый телем көрмәкләнде. Үч иткәндәй текстта берничә тапкыр кабатлана әле ул. Авырлы чагым. Йөрәгем сикерә башлады, тыным кысылды, тапшыруны иртәрәк тәмамларга туры килде. Нерв киеренкелегеннән хәлем китеп егылдым. Ашыгыч ярдәм хезмәтен чакыртырга туры килде. Туры эфир ярты чәчне агарта ул.
– Кием- салымга таләпләр бар идеме?
– Бер- беребез белән ярыша- ярыша киенә идек. Кофтаның бер көнне алдын, икенче көнне артын әйләндереп киябез. Аны бусы, яулыклар белән бизибез. “Ильдан” театр мода студиясе нык ярдәм итә иде безгә. Берара телевидение алып баручылар өчен киемнәр тектерде. Алар әле дә шкафымда эленеп тора. Экранга чыкканда зәңгәр, ап-ак, кап-кара киемнәр кияргә кушмыйлар иде. Операторлар шакмаклы, түгәрәкләр төшерелгән блузкалар да рөхсәт итмәде.
– Эльмира ханым, 80 яшь тулуга карамастан матурлыгыгызны югалмыйсыз, сөбханалла. Моның сере нәрсәдә?
–Һәркем матурлыкны үзенчә аңлый. Көн саен физик күнегүләр ясыйм. Җәяү йөрергә тырышам. Элек чаңгыда чыга идем. Ит ашамыйм, чәйне шикәр белән эчмим. Борычлы, тозлы ризыкларны чикләдем. Балык, тавык итенә өстенлек бирәм.

Эльмира Хамматова көндәлегеннән:
Туры әйткән туганына ярамый. Хәзер тәнкыйтьне кабул итә белмиләр, мактаганны гына яраталар. Йә мактыйсың, йә бер сүз дәшмичә, үз эчеңдә калдырасың.

Көчле кешеләргә генә сынаулар бирелә.

Тормышта билгеләр бик күп, аларны күрә белергә кирәк. Бер бәхет ишеге ябылганда, икенчесе ачылганны күрми калма.

Бурычтан котылу өчен дога

Аллаһүммәкфини бихәлә-ликә ган хәрамик, үә әгънини бифадьликә гаммән сиүәк.
Мәгънәсе: И, Аллаһ! Синең хәләлең миңа җитеп, үзең харам кылган нәрсәгә керүдән мине котылдыр һәм, Үзеңнең фазыйләтең белән, Синнән башкага мохтаҗ булудан коткар.

Иң авыры - егетләрне кабат элекке тормышка кайтару
Казанда шәһәр үзәгендә урнашкан “Батырлар терәге” ресурс үзәгенә барган идем. Хәрби операциядә катнашучыларның һәм аларның гаиләләре өчен алыштыргысыз урын бу. Массаж, күнегүләр ясау кабинетлары, психолог белән сөйләшү, музыка, кул эшләре, спорт белән шөгыльләнү урыннары да каралган. Үзәкнең җитәкчесе – Татарстан мөфтиенең махсус хәрби операциядә катнашучыларга һәм аларның гаиләләренә ярдәм итү буенча урынбасары Мансур хәзрәт Җәләлетдин.
–Беренче эш итеп махсус хәрби операциядәгеләргә гуманитар ярдәм илтә башладык. Солдат хатыннарына, балаларына, тол калучыларга социаль- рухи ярдәм күрсәтү, аларны борчыган сорауларга җавап бирү өчен дә “Батырлар терәге” үзәге булдырырга кирәк иде. Хәрби бәрелешләр тынар, илләр тынычланыр, тик бу үзәк хәрбиләргә, аларның хатыннарына аннары да кирәк булачак әле, –ди Мансур хәзрәт.
Хәрби операциядән яраланып кайткан егетләр арасында эчүгә сабышучылар, яшәү мәгънәсен югалткан кешеләр дә бар икән. “Аларны кабат тормышка кайтару –иң авыры”, ди хәзрәт.
–Бер егет махсус хәрби операциядән ике аяксыз кайтты. Аны хатыны ташлады. Ул эчүчелеккә бирелде. Аның белән озак сөйләштек. Егет, барысын да аңлап, үзендә яңа тормыш башларга көч тапты. Чибәр генә кызга өйләнде. Тиздән балалары туачак. Ә ул егет бездә хәрби операциядән кайтучылар белән эшли. Чөнки аларның хәлен бары тик ул мәхшәрне үз башыннан кичкәннәр генә аңлый, – ди Мансур хәзрәт.

Испаннар биюен карап ял итеп алыгыз әле) Мәктәптә Халыклар дуслыгына багышланган бәйгенең 2нче туры узды. Бу безнең 8нче сыйныф укучылары. Профессиональ биючеләрдән ким түгелләр, име 👍❤

Безнең ишегалдында Шөһрәт абый җиләк- җимеш сата. Ул Үзбәкстаннан. Гадәти булмаган кавын сорты алып кайттым әле, ди. "Җыерчыклы әби" дип атала икән. Тышы чынлап та җыерчыклы. Үзеннән кыяр, кавын, кабак тәмнәре килә, бик сусыл. Баксаң, кавынның Үзбәкстанда 160 тан артык сортын үстерәләр икән.
Кавын кан әйләнешен яхшырта, чәчләрне, тырнакларны ныгыта, йөрәк, кан тамырлары авыруларын кисәтә. Ә менә ашказаны авырулары булганда, аллергияле кешеләргә саграк булырга кирәк.

Сара Садыйкованың юбилей концертына кызы, 101 яшьлек Әлфия Айдарская да килгән иде❤

Нигә көндез йокы килә?
Кайчакта күпме йокласаң да, организм ял итмәгән кебек. Көне буе апын-төпен йөрисең, күзләр йомыла, баш авырта. Гел ятасы гына килеп тора. Бу чынлап та йокы туймау аркасындамы, әллә, сәбәбе башка булырга мөмкинме? Бу хакта Казанның 21нче сырхауханәсендә табиб, терапевт, көндезге стационар бүлек мөдире Гөлназ Шакирова белән сөйләштек.
–Гөлназ Фәнисовна, көндез йокы килү нормаль күренешме?
– Әгәр кеше төнлә юньләп йокламаса, көчле стресс кичергән булса аның көндез ятып торырга теләве гадәти күренеш. Аерым бер сәгатьләрдә: 13.00-15.00гә кадәр һәм 2.00-4.00 аралыгында кешенең дәрте сүрелгән вакытлар булып санала. Әгәр кеше җитәрлек йоклап та, көн саен йокы туймаудан зарланса, көн саен көндез йокысы килсә, ниндидер эш башкарганда, атлап барган җирдән йоклап китә башласа, хәтере начарланса, хәлсезлек тойса, игътибары кимесә, баш авыртулар еш күзәтелсә, кан басымы гел күтәрелеп, төшеп интектерсә, хастаханәгә барырга киңәш ителә.
–Кеше көненә ничә сәгать йокларга тиеш?
–Үсмерләргә көненә 8-10 сәгать, (балаларга тагын да күбрәк), зурларга 7-9 сәгать, өлкән яшьтәгеләргә 6-8 сәгать йоклау норма булып санала. Дөрес, күп очракта ничә сәгать йоклаудан бигрәк, йокының сыйфатлы булуы мөһим.
–Йокламау нәрсә белән куркыныч?
–Йокысы туймаган кеше үзен хәлсез итеп хис итә. Мәгълүматны кабул итә алмый, игътибары кими. Йокысызлык гормональ үзгәрешләргә, матдәләр алмашы бозылуга китерә. Нәтиҗәдә кешенең гәүдә авырлыгы артырга, тырнаклар сынарга, чәч коелырга мөмкин.
Йокы сыйфатлы булсын өчен нишләргә?
1. Йокларга бер сәгать кала компьютерда утырмагыз, телефон да карамагыз. Кичке сәгатьләрдә интернеттан мәгълүмат укып яту да файдага түгел, бу йокыны качыра.
2. Телевизор караганчы, йоклар алдыннан китап укысагыз яхшырак.
3. Ятканчы саф һавада йөреп керү әйбәт.
4. Мендәрегез, киемегез уңайлы булсын.
5. Йоклар алдыннан ашамагыз.