Кара миләшнең файдасы турында сөйләп тору кирәкмидер дә. Ләкин аны…

Кара миләшнең файдасы турында сөйләп тору кирәкмидер дә. Ләкин аны тиешле дозада язга кадәр куллану өчен саклау чараларын да белергә кирәк. Быел без бик җайлы бер ысулны кулланасы иттек. Бу - киптерү. Киптерү өчен юылган кара миләшләрне кәгазь тастымал белән корытырга кирәк. Табага яки мич калайларына пергамент кәгазе җәеп, җиләкләрне берәр катлап таратырга һәм электр яисә газ мичендә 100 градуста 1.5-2 сәгать чамасы киптерергә кирәк. Тагын бер мөһим искәрмә: миләшләр кипкәнче мич каядыр 2-3 см тирәсе ара белән ачык торырга тиеш. Шулай эшләмәсәң алар артык пешеп, көяргә мөмкиннәр. Мичне сүндергәч тулысынча ябып, миләшләрне мич суынганчы алмыйбыз. Суынган миләшләрне киндер яисә мамык тукымадан тегелгән янчыкларда сакларга кирәк.
Электр киптергечендә дә киптерергә мөмкин, ләкин бу ысул 70 градуста каядыр 17- 20 сәгать таләп итәчәк.
Миләшләрегез әле дә коелып бетмәгән булса, кулланып карагыз.