Игорь ГУБАЕВ

Шыже там

Шыже тамым шарен, лышташлам шуэмден,
Йӱдвел могыр юалге мардеж пуалеш.
Кас юж ден шӱлалтен, эртен кодшым шарнен,
Мый тошкемыш лектам - утыр шӱм вургыжеш.

Чашкерлам таялтен, олык лапыш волен,
Кас кандалге лыжган ял ӱмбак лишемеш.
Пуйто кодшо кеҥежым чон вошт чаманен,
Клуб воктечын ойган гармонь йӱк шып иеш.

Кеҥеж кече гаяк жап эрта кеч-кӧнат,
Ок лий тудым чараш, ни уэш пӧртылташ.
Юарлен куржталмет ушыштетшак гынат,
Кайык гай рвезе жап тарвана чоҥешташ.

Жап шуэш, да кеҥеж адакат пӧртылеш.
Адакат умыр кас муро ден тич темеш.
Но ок пӧртыл тунам рвезе пагыт уэш,
Лач шӱмеш курымешлан кышаже кодеш.

Авторын фотожо.