86 йәшлек ирекмән яугирҙәргә тәсбихтәр әҙерләй
Фёдоровка районының Федоровка ауылында йәшәүсе 86 йәшлек Наилә Сәйетбатталова изге эш башҡара — яугирҙәребеҙ өсөн мосолман тәсбихтәре эшләй.
Был сабырлыҡ талап иткән эште башҡарғанда, Наилә Нәғим ҡыҙы яугирҙарҙың һаулығы, ныҡлығы һәм еңеү менән тиҙерәк өйҙәренә ҡайтыуҙары өсөн ихлас күңелдән доғалар уҡый.
Изге эштә ул яңғыҙ түгел — уға Мөхәмәтшиндар ғаиләһе лә ярҙам итә. Ҡаты хөрмә төштәрен тишеү кеүек иң ҡатмарлы эште Гәрәй ағай үҙ өҫтөнә алған, ә Зәйтүнә апай башҡа эштәрҙә булыша.
Әҙер доғалы тәсбихтәр «Шьем для солдат» ирекмәндәр төркөмө аша фронтҡа оҙатыла. Оло быуындың ихлас, изге ғәмәленә һоҡланабыҙ! Ә ил һаҡсыларына бер генә теләк — тиҙерәк Еңеү менән тыуған яҡтарына ҡайтырға яҙһын!