Яугирҙарға - өй йылыһы

Уҡытыусылар һәм журналистар «Берҙәмлек өмәһе»н ойошторҙо.
"Юлдаш" радиоһының ирекмән-журналистары һәм Фатима Мостафина исемендәге 20-се ҡала башҡорт гимназияһы уҡытыусылары яугирҙарға туҡмас ҡырҡты. Уҡытыусыларҙың каникул мәле ошондай файҙалы һәм изге эштәр менән үрелеп бара.

Изге теләктә, доғалар уҡып баҫылған ҡамыр ризыҡтары яугир егеттәргә өй йылыһын, тыуған яҡ сәләмен еткерһен. Батыр егеттәребеҙ Башҡортостандан барған тәмле аш-һыуҙы әҙерләп, башҡа милләт вәкилдәрен, хеҙмәттәштәрен дә һыйлар тигән өмөттәбеҙ, - ти ойоштороусылар.

Фатима Мостафина исемендәге 20-се ҡала башҡорт гимназия коллективы бөгөн яугирҙар өсөн ысын мәғәнәһендә ныҡлы тыл. Бында даими өмәләр ойошторола: татлы сәк-сәк әҙерләнә, гуманитар ылау туплана, уҡыусылар яугирҙарға хаттар яҙа.

"Киләсәктә лә гимназия менән берлектә изге өмәләр ойошторорбоҙ, тип килештек. Эшебеҙҙе «Юлдаш» радиоһының девизы менән "БЕҘ БЕРГӘ!"– тип, күтәренке кәйеф менән тамамланыҡ", - ти ирекмән ҡыҙҙар.