Марий Элын калык артистше Эдуард Яковлев М. Шкетан лӱмеш Марий театрыште таче ик эн шуко модшо актер.
Труппыш ушнымеке, 50 ияш лӱмгечыж марте репертуарже веле огыл, шкежат кӧргӧ чон дене чот пойдаралтын, мастарлыкше кушкын. Модмо персонажше ынде ийгот дене веле огыл, должность да чин шотыштат утларак кугу улыт. Ончалза, лӱмыштак могай: бизнесмен Тукманов, Комиссар Ванька, министр Милентий Никандрович, генерал Рыбаков, врач Бороздин, колхоз председатель Шумелев…
🎭А вет жапыштыже, самырыкракше годым, «Кеҥеж йӱдыштӧ» бухгалтер Алгаевым модын. А ынде Шумелевын рольышто «йӱштылеш» - моткоч чаплын келыштара: муралтенат колта, кушталтен-тавалтымыжат пеш келша. Таклан огыл лӱмгечыжлан лач тиде чапле спектакльым ойырен налын: калыкланат ты комедий путырак чот келша, шкаланжат тудо чон семын.
❤️Зал ден сцене, ончышо ден артист икте-весым ик ончалтыш гычак шижыт да умылат гын, тунам бенефис кас чылаштынат чонешышт да ушешышт келге кышам кода манын шоныман.
____________
🎭 «Кеҥеж йӱд» Эдуард Яковлевын бенефисше
🗓️ 22 ноябрь 16:00
🎟️ Билетым налаш