Марий Элыште тӱня кумалтыш тений Кужэҥер районысо Шорнотышто 18 октябрьыште лиеш.
Тӱня кумалтышлан палемдыме ото-влак Советский, Шернур, У Торъял да Кужэҥер районышто верланеныт. Кажныштыже кумалтыш вич ий коден эртаралтеш. Шыжым эртарыме тиде кумалтыш ик эн виянлан шотлалтеш. Тушко вич тулолмо дене республикын шуко районжо гыч онаеҥ-влак кумалаш толыт. Тӱня кумалтыште еҥ-влак уржа-сорла лектышлан тауштат, тыгак тыныс, перке, сай илыш верч кумалаш тӱҥалыт.
Тӱня кумалтышыш тӱрлӧ кундемла гыч чумыргат. Кодшо ийла семынак, кумалтышке еҥ-влак чонан дене, ший надыр дене толыт. Пӧлек шотеш солыкым, шовычым кондат. Пӧлек шотеш погынышо солык-влакым онаеҥ-влак спецопераций кайыме верыш, госпитальлаш колташ кутыреныт.