Йошкар-Олаште Тӱнямбал Руш Калык Соборын (ВРНС) икымше региональный форумжо эртаралтеш.

Форумын Калык-влак келшымаш пӧртыштӧ лийше пленарный заседанийышкыже Марий Элым Вуйлатыше Ю.Зайцев ушнен. Мероприятий «Традиционные ценности – основа развития России» темылан пӧлеклалтын.

Тылеч ончыч регионым Вуйлатыше ВРНС-ын вуйлатышыжын алмаштышыже, «Россия Православная» Российысе мер толкынын председательже Михаил Иванов да ВРНС секретариатын вуйлатышыже иерей Василий Лосев дене вашлийын. Тушто черке, кучем да калык кокласе кыл нерген мутланеныт.

Форум годым тыгак Российын историйже да чон поянлык теме-влаклан пӧлеклалтше йыргешке ӱстел-влак эртаралтыныт, лекцийым лудыныт, кином ончыктеныт. Мероприятий 16 октябрьыште мучашлалтеш.