"Без бергә" Яшь талантлар Арча сәхнәсендә.

23 октябрьдә Арча районында «Без бергә» республика балалар халык иҗаты фестиваленең зона этабы узды. Чара Татарстан Республикасы Мәгариф министрлыгы һәм Республика мәктәптән тыш эшләр үзәге белән берлектә оештырылды.

Г.Курсави исемендәге Арча күппрофильле лицее сәхнәсендә Арча, Питрәч, Балтач, Кукмара, Саба, Теләче һәм Әтнә район этаплары җиңүчеләре чыгыш ясады.

10 еллык тарихы булган фестиваль балаларның сәләтен ачу һәм милли-мәдәни мирасны саклау өчен мөһим мәйданчыкка әверелде. Быелгы бәйге Россия халыклары бердәмлеге елына һәм Габдулла Тукайның 140 еллыгына багышланды.

Конкурс буыннарны берләштерә, гореф-гадәтләрне яшьләргә тапшыруга ярдәм итә һәм Татарстан халык мәдәниятенең байлыгын ачык чагылдыра.

#безбергә
#безбергәАрск