Хайахсыт нэһилиэгин «Дьулуур» пенсионердар сэбиэтин аатыттан отзыв:

«Алтынньы 15 күнүгэр, Ийэлэр күннэригэр аналлаах декада чэрчитинэн, Хайахсыт нэһилиэгин ийэлэрэ бэртээхэй айаҥҥа туруннубут. Сыалбыт-сорукпут - историяны кытары алтыһыы, уруккуну ахтан-санаан ааһыы.
Биһигини ураты истиҥник көрсүбүт Хатылы көһөрүллүүтүн түмэлин салайааччытыгар, Марфа Владимировнаҕа, барҕа махталбытын тиэрдэбит!
Марфа Владимировна хас биирдии экспонат туһунан иэйиилээхтик кэпсээн, ааспыт кэм тыынын биһиги сүрэхпитигэр тилиннэрдэ. Көһөрүллүү алдьархайын, ону туорааһын дьоруойдуу холобурун истэн, уйулҕабыт хамсаата, харахпыт ууланна. Бу маннык историяны дириҥник билэр, норуотун кутун-сүрүн илдьэ сылдьар киһи кэпсиирэ - улахан дьол.
Маннык сылдьыбыт сырыыбыт биһиэхэ, ийэлэргэ, хас да суолталаах:
- Оҕолорбут, сиэттэрбит инники олохторугар бу курдук алдьархай хатыламматын туһугар, ааспыты умнубакка, үүнэр көлүөнэҕэ тиэрдэр ытык иэстээхпитин өссө төгүл итэҕэйдибит.
- Күннээҕи түбүктэн сынньанан, өй-санаа сааһыланар, олох суолтатын, дьиэ кэргэн, дойду туһугар харыстабыллаах сыһыан наадатын өйдөөтүбүт.
- Биир дойдулаахтар буолан, биир тыынынан сылдьан, бэйэ-бэйэбитин кытары чугасаһан, кэпсэтэн-ипсэтэн, күүс-уох эбиннибит.
Махтал буоллун, Марфа Владимировнаҕа бу курдук норуоппут историятын харыстыы сылдьаргар! Эһиэхэ үлэҕитигэр үрдүктэн үрдүк ситиһиилэри, кэскиллээх былааннаргыт туолалларыгар баҕарабыт!
Умнумуоҕуҥ, историябытын! Кэлэр кэнчээри ыччаппытыгар тиэрдиэххэ, сырытыннарыахха диэн санаалаах кэллибит.
"ДЬУЛУУР" пенсионердар сэбиэтэ».