*ТААТТАҔА САХА ТӨРҮТ АҺЫН КҮНЭ ТӨРҮТТЭННЭ*

Тааттатааҕы норуот айымньытын дьиэтигэр, дьоро күҥҥэ кыттыһа, дьон - сэргэ тоҕуоруһа мустубут, саалаҕа сиэдэрэй быыстапка тэриллибит. Бүгүн, Таатта улууһун Аҕа баһылыга Айаал Семенович Бурцев уурааҕынан, Саха төрүт аһын күнэ тэрилиннэ. Ону бигэргэтэн, өбүгэ саҕаттан илдьэ кэлбит иҥэмтэлээх төрүт аспытын аһаан доруобай буолар, ас нөҥүө иҥэриллэр сиэр-туом өйдөбүллэрин көлүөнэттэн көлүөнэҕэ бэриллэн, аныгы үйэҕэ абылыыр амтаннаах буола сайдарын туһугар Таатта улууһун уонна «Тыгын Дархан» ресторан икки ардыгар бииргэ үлэлэһэр сөбүлэҥҥэ илии баттанна. Бу күн Тааттаттан төрүттээх асчыт уолаттар, Саха сирин Дархан асчыта Иннокентий Тарбаахап үөрэнээччилэрэ  «Тыгын Дархан» ресторан шеф повардара Константин Матаннанов, Антон Евграфов, «Тыгын Дархан» повара  Михаил Аввакумов уонна «Река озеро лес»,«Тайга» рестораннар повардара Прокопий Толстяков ох курдук оҥостон, айаннаан тигинэтэн кэлэн сахабыт минньигэс амтаннаах аһын, саха лэппиэскэтин, соботтон рулеты, астаах саламааты, чир балыктан индигирканы астаан, дьикти көстүүлээн, сиэдэрэй амтаннаан, көрөөччүлэргэ кистэлэҥнэрин сэгэтэн сүбэлээн,  амсатан биир дойдулаахтарын биһирэбиллэрин ыллылар. Уолаттар аны саас кэлэн, алаас ахтылҕанын аһыттан астаммыт төрүт аһы амсатар тэрээһини ыытар баҕа санааларын биллэрдилэр. Онон төрүттэммит күммүт үтүө салҕааһыннаах буоллун!
Тэрээһин тэрийиитигэр көмө буолбут улуустааҕы тыа хаһаайыстыбатын салаатыгар (сал. Г.С.Кычкин), «Баай ас» ТХПК (сал.С.Н.Андросов), «Нал үүт» ТХПК (сал. Т.А.Барбасытов), «Түмэн» ТХПК (сал.Т.А.Макаров) барҕа махталбытын тиэрдэбит.

Улуустааҕы норуот айымньытын дьиэтин пресс - киинэ

https://max.ru/id1425005487_gos