Бүгүн, Саха сирин былааҕын күнүгэр, С. С. Сюльскай аатынан Сүлэ орто…

Бүгүн, Саха сирин былааҕын күнүгэр, С. С. Сюльскай аатынан Сүлэ орто оскуолатын 5–11 кылаастарын оҕолоро уонна кылаас салайааччылара үтүө дьыалаҕа көхтөөхтүк кыттыстылар. Кинилэр күүстэринэн нэһилиэк сынньалаҥ пааркатыттан хаппыт мас уонна мутук хомулунна, паарка иһэ лаппа тупса уонна ырааһыра түстэ.
Бу тэрээһин кэлэр сылга буолуохтаах IX спортивнай оонньууларга бэлэмнэнии чэрчитинэн ыытылынна.

Нэһилиэк дьоно-сэргэтэ үөрэ-долгуйа күүтэр улахан тэрээһинэ чугаһаан, бу паарка эһиил өссө кэҥээн, араас сибэккилэринэн уонна мастарынан киэргэтиллиэхтээх. Маны таһынан, былааҥҥа аныгы беседкалар, сайыҥҥы кинотеатр уонна оҕо оонньуур площадкатын тутуута көрүллэр.

Онон оҕолорбут бүгүҥҥү үлэлэрэ — Сүлэбит дьоҕус сынньалаҥ паарката тупсарыгар улахан олук буолла. Оскуолабыт үөрэнээччилэрэ маннык нэһилиэк уопсастыбанай олоҕор, тупсарыы үлэлэригэр төһүү күүс буолаллара уонна үтүө холобуру көрдөрөллөрө олус үөрдэр. Сынньалаҥ пааркатыгар ыытыллыбыт суббуотунньук нэһилиэк иһинээҕи «190 үтүө дьыала» аахсыйа уочараттаах бэлиэ хардыыта буолла.

💟 81-с үтүө дьыалаҕа көхтөөхтүк кыттыспыт С. С. Сюльскай аатынан орто оскуола оҕолоругар уонна учууталларыгар барҕа махтал!