🔹«Тыва Республиканың ГТО рекордчулары» деп мөөрей Совет Тываның 5 чылы аттыг стадионунга болуп эрткен. Спортчулар ГТО нормаларын дужаап, күш-шыдал, дүрген болгаш ээлгир чорук талазы-биле мөөрейлешкен.

Күш-культура болгаш спортту нептередир, ГТО нормативтерин күүседиринче сонуургалды бедидер, ол ышкаш эң шыырактарны тодарадыр сорулга-биле хемчегни организастап эрттирген. Мөөрейниң программазында дорт туруп алгаш ийи холун эң куду бадырары, ийи бут-биле тептингеш узунун шураары, спортчу снаряд октаары, шыдамык чорукка чарыш кирген.

Эр улус аразынга маргылдааларның түңнелинде, дараазында киржикчилер эң-не тергиин түңнелдерни көргүскен: 3 км чарышка – Монгуш Уяраш (11:53); дорт туруп алгаш ийи холун эң куду бадырарынга - Ховалыг Уран-Херел (23 см); узунун шураарынга – Сат Буян-Доржу (253 см); 700 г деңзилиг снаряд октаарынга – Ховалыг Уран-Херел (40,9 м).

Херээженнер аразынга рекордчулар: 2 км чарышка – Шалган Айнура (8:29); дорт туруп алгаш ийи холун эң куду бадырарынга — Шалган Айнура (32 см); узунун шураарынга — Калин-оол Чодураа (200 см); 700 г деңзилиг снаряд октаарынга — Калин-оол Чодураа (22,9 м).

Мөөрейлер киржикчилери ээлгирин, күш-шыдалын, дүргенин, шыдамык чоруун көргүскеннер. Тиилекчилер болгаш шаңналче киргеннер тергиин түңнелдерни көргүзүп, республиканың спортчуларының күш-шыдал белеткели бедик дээрзин база катап бадыткаан.

ГТО (Күш-ажылга болгаш камгалалга белен) комплекизи республиканың чурттакчыларынга чүгле мага-бодун хынаар арганы эвес, а практиктиг шылгалданы берген. Күүсеттинген нормативтер дээди өөредилге черлеринче дужаап киреринге хууда чедиишкиннер кылдыр санаттынар, а ГТО киржикчилери үндүрүгден тырткан түңнү эгиттирип ап болур.