ЙОМАК - ЙОМАК ГЫНА ОГЫЛ
Кеч-могай саманыштат тудо, икшыве-влакым илышлан туныктен куштымо негыз семын, шке кӱлешлыкшым огеш йомдаре. Лач тыгай кумыл Елтек ялысе клубышто озаланен: марий калык йомак-влак дене йоча-влакым палымым ышташ, уэш шергалын лекташ да пырля лончылаш тыште творческий вашлиймашым тарватеныт.
Кушто клуб вуйлатыше Л.Г. Идрисова, библиотека пашаеҥ Б.А. Салимьянова улыт, туштак, ынде школ паша гыч канышыш лектыныт гынат, ончычсо туныктышо-влак М.Н. Адылгареевам, А.Т. Асылбаевам ужаш лиеш. Нуно кушкын толшо тукым дене пырля пашам ыштат.
Тыгай кутырымаш йомакыште мом каласаш шонымым рашемдыме дене пырля лудаш, шочмо йылмым палаш кӱлмым, тудын гоч шукым умылаш тунемаш, сай шинчымашым налаш лиймым йоча-влак деке шукташ - пеш сай йӧн. Йоча чонлан келша гын, тунам нуно тӱткын колыштыт, шке семынышт шонкалат. Тидыже чурийышт гычак коеш. Тыштак газетым, поснак шочмо йылме дене лекшым, шочыкташ шагал огыл вийым пыштыше ончычсо тукымысо талешке еҥ-влакын суапле пашаштым аклыме, тиде поянлыкым арален кодаш умбакыжат шкаланнак тыршаш кӱлмӧ нергенат чон почын кутырышна. Илыш вашталтеш, но марийын чон поянлыкше мерчышаш огыл. ЙЫЛМЫНА ДЕЧ ПОСНА МЕ КӦ ЛИЙЫНА? Тиде эн тӱҥ йодыш. Тудым умылымаш - тачысе кечын тӱҥ задачына. Йомдараш куштылго, шочыктымо гай огыл. Газет-влакым петыраш тӱҥалме саманышкат илен шуынна. «Чолман» газет тыгай радамыш огеш логал, ончыкыжат илаш тӱҥалеш, тудлан возалташ да лудаш тӱҥалына манын, йомак кугыжанышын моральже сынан иктешлымаш дене усталык вашлиймашнам пайдалын мучашлышна.
Игорь ГУБАЕВ.
Елтек - Нефтекамск.