«ОШВИЧЫЖАТ- ЙӰКСЫЖАТ…»

Ахмет Асаевын школышто тунемме годымак чонеш шыҥен кодшо романжын лӱмжӧ Елтекыш каяш тарванымем сайын ушыш толын пура.
Тиде гана Дӧртыльӧ ола деч вара писательын шочмо лукышкыжо савыралше корно дене шыже пӱртӱсын ик-кок кече жапыште кенета вашталт кертмыжым эскерен кайышым. Теве гына куэ помышышто лышташ-влак ужаргын йолген кечат ыле. «Шыже кужаш шуйна дыр», - шонышым.
Икмыняр кече веле эртыш, ынде, ужар сывын гай шарлен вочшо озым гоч куэрла могырыш але посадкыш ончалат гын, кечан кечыште шӧртнялгын оварген шогышо куэн ладыра парчаже-влак шинчам йымыктараш тӧчышыла ковыраланен волгалтмым ужат.
Шыма тӧр корно дене Елтек могырыш кудалаш путырак каньыле, пытартыш ийлаште ожнысо лаке-лукан, лавыран ужашыже-влакым ачаленыт, асфальтым вакшыныт.
Лӧзаҥ кушшо озым пасум чаткан курал пыштыме аҥа вашталта. Ончет-ончетат, тыгай годым мланде шӱй гай чуҥ шем тӱсат куандара. Шеме - мотор огыл, маныда? Кумдыкеш тыгай сӱретым ужын, чон йошкар-ужар-шӧртнялге чиялан веле огыл, шем пасуланат куана! Молан манаш гын корно мучко нигуштат «тулыкеш кодшо» мландыш савырныше пасу-влакым шым уж, ты районышто мланде паша ожнысо гаяк шукталт толеш.
Корно воктенсе посадке вес могырно кугу куатан комбайн-влак телылан кургым шапашлыме сомылым шуктат, кукурузым солат. Калыкыште ойлымо гай, пурактарен пашам ыштат - комбайным рашын ужашат ок лий, нӧлталме пуракыштышт пыл коклаште ийын эртымыла койыт.
А теве тораште, кумдан шарлен вочшо вӱд ӱмбалне, Елтек ял шкежат койылалтыш… Тушто мыйым «Йомак кугыжаныш» вучен.