ОКТЯБРЬ 11 — КӨДЭЭ АЖЫЛ-АГЫЙ АЖЫЛДАКЧЫЛАРЫНЫҢ ХҮНҮ

💥Ярмаркадан эгелээн

📢Россияның көдээ ажыл-агыйының болгаш болбаазырадылга агроүлетпүрүнүң ажылдакчыларының хүнүн 2026 чылдың октябрь 11-де демдеглеп эрттирер кылдыр доктааткан. Бо хүнде тараажылар, малчыннар, агрономнар, мал эмчилери, чер болгаш мал продукциязын болбаазырадыр адырның ажылдакчылары дээш ажылы, эртем-билии көдээ ажыл-агый-биле харылзаалыг кижилерге байырны чедирип, оларның чедиишкиннерин демдеглеп, шаңнап-мактап турар.
Тывага Көдээ ажыл-агый ажылдакчыларының хүнүн, дүжүт ажаалдазы адакталырга-ла, октябрь 11-ниң бүдүүзүнде хүннерде, байырлап эгелээн. Кожууннарга бо күш-ажылчы байырлалдың бир кол кезээ — “Алдын күс” деп ярмаркалар.
Найысылал Кызыл хоорайга Көдээ ажыл-агыйының болгаш болбаазырадылга агроүлетпүрүнүң ажылдакчыларының хүнүн октябрь 23-те Улусчу чогаадылга бажыңынга байырлап эрттирген. Республиканың фермерлери, көдээ ажыл-агый продукциязын болбаазырадып турар бүдүрүлгелерниң ажылдакчылары ярмарка-биле байырлалды ажытканнар. Олар бүдүрүп үндүрген аъш-чемин, барааннарын Улусчу чогаадылга бажыңынга делгеп саткан. “Арзайты” көдээ ажыл-агый кооперативи, “Ортулук” КХН, хууда бүдүрүлгелер “Лойгу Ю.Ш.”, “Шогжал М.М.”, “Лащев О.Н.” дээш бүдүрген продукциязының шынары эки, чонга билдингир апарган өске-даа бүдүрүлгелерниң аъш-чемин, барааннарын ярмаркага келген хереглекчилер садып ап турганнар.
Ярмарканың киржикчилери “Лойгу Ю.Ш.”, “Шогжал М.М.” хууда бүдүрүлгелерге «Сделано в России» сертификатты тывыскан. Бо сертификат оларга российжи болгаш даштыкы рыноктарга боттарының бүдүрген аъш-чемин, барааннарын садып-саарар арганы берген. Эъттен кылган продукциязын “Мерген” деп бренд-биле садып-саарып турар “Шогжал М.М.” хууда бүдүрүлге 2022 чылда Моолдуң төвү Улан-Батор хоорайга болуп эрткен «Ворота в Азию» деп XXXV чурттар аразында делгелге-ярмаркага чедиишкинниг киришкен, аңаа делгээн продукциязының шынары “кончуг эки” деп демдеглеттинген.
“Лойгу Ю.Ш.” хууда бүдүрүлге 2025 чылда Национал сайгарлыкчы чоруктуң «Бизнес-Успех» шаңналының “Эң эки көдээ ажыл-агый төлевилели” номинацияга тиилекчи болган. Сайгарлыкчының төлевилелин ол хире бедик деңнелге үнелээни ооң Тывада көдээ ажыл-агыйның хөгжүлдезинге киирип келген үлүүнүң бедик үнелели-дир. “Лойгу Ю.Ш.” хууда бүдүрүлгениң сүттен болбаазырадып кылып турары “Тарак” «Сделано в России” сертификатты 2026 чылдың апрельде алган.
Улусчу чогаадылга бажыңының ийиги каъдынга Тывага көдээ ажыл-агыйның сайзыралының төөгүзүнүң дугайында фото-чуруктар делгелгезин база организастаан. Ол делгелгеде чуруктардан республиканың көдээ ажыл-агыйының канчаар хөгжүп келгенин байырлалга келген аалчылар билип ап, аңаа боттарының улуг үлүүн киирген кижилерниң чуруктарын көрүп турганнар.

📢БЕДИК ШАҢНАЛДАР

Улусчу чогаадылга бажыңының улуг залын көдээ ажыл-агый ажылдакчыларының хүнүнге тураскааткан байырлалга чалатканнар долдур олурупканнар. Олар малды азырап өстүрүп чоруур малчыннар, тарааның чаагай дүжүдүн ажаап ап турар тараажылар, көдээ ажыл-агыйның бедик мергежилдиг специалистери болгаш ажыл-агыйларның удуртукчулары.
Көдээ ажыл-агый ажылдакчыларының хүнүнге болгаш Тываның Көдээ ажыл-агый яамызының 95 чылынга тураскааткан байырлыг хуралды Тыва Республиканың Чазааның Даргазының оралакчызының албан-хүлээлгезин күүседип турар Уран-оол Ондар ажыдып, республиканың көдээ ажыл-агыйының болгаш болбаазырадылга агроүлетпүрүнүң ажылдакчыларынга оларның профессионал байырлалы-биле байырны чедирип, белен эвес болгаш буянныг ажыл-ижинге моон соңгаар-даа чедиишкиннерни күзээн.
Республиканың көдээ ажыл-агыйында болгаш болбаазырадылга агроүлетпүрүнде чедиишкиннер болгаш келир үеде планнар дугайында Уран-оол Ондар чугаалап тура, Тываның Баштыңы Владислав Ховалыгның саналы-биле ажылдап кылган, келир 2027 чылда боттандырып эгелээр “Хойжу” төлевилелин демдеглеп, бо төлевилел Тывага хой-өшкү ажыл-агый адырын 2031 чылга чедир улам бедик деңнелче көдүрер ужурлуун демдеглээн.
Тыва Республиканың көдээ ажыл-агый сайыдының албан-хүлээлгезин күүседип турар Айдыс Куула