Евангелие от Луки

Лк.9:12–18 (зач. 42).

День же нача́т прекланя́тися. Присту́пльше же обана́десяте реко́ша Ему́: отпусти́ наро́д, да ше́дше во окре́стныя ве́си и се́ла вита́ют и обря́щут бра́шно, я́ко зде в пу́сте ме́сте есмы́.

Рече́ же к ним: дади́те им вы я́сти. Они́ же ре́ша: несть у нас вя́щше, то́кмо пять хлеб и ры́бе две, а́ще у́бо не ше́дше мы ку́пим во вся лю́ди сия́ бра́шна.

Бе́ху бо муже́й я́ко пять ты́сящ. Рече́ же ко ученико́м Свои́м: посади́те их на ку́пы по пяти́десят.

И сотвори́ша та́ко, и посади́ша их вся.

Прии́м же пять хлеб и о́бе ры́бе, воззре́в на не́бо, благослови́ их, и сломи́, и дая́ше ученико́м предложи́ти наро́ду.

И ядо́ша, и насы́тишася вси, и взя́ша избы́вшия им укру́хи ко́шя двана́десяте.

И бысть егда́ моля́шеся еди́н, с Ним бе́ху ученицы́, и вопроси́ их, глаго́ля: кого́ Мя глаго́лют наро́ди бы́ти?