Циндзинады иуӕй-иу домӕнтӕ.
1. Циндзинадмӕ цӕуын хъӕуы ӕмбӕлгӕ хуызы, бӕрӕгбоны уӕлӕдарӕсы. Ӕрдӕгбӕгънӕгӕй, спортивон дзаумӕтты чи бацӕуы, уыдон ӕфхӕрынц фысымты, худинаг кӕнынц сӕхи ӕмӕ сӕ мыггӕгты.
2. Цины фынг у кувӕн, уаз бынат, ӕмӕ дзы алчидӕр йӕхи хъуамӕ дара уымӕ гӕсгӕ.
3. Бинонтӕй иу фынгыл иу лӕгӕй фылдӕрӕй бадын не’мбӕлы.
4. Ӕнӕус лӕппуты хистӕртимӕ бадын кӕнын раст нӕу. Худинаг у уыцы фынгыл лӕгтимӕ сывӕллоны бадын кӕнын дӕр.
5. Фыдыфыд, фыд, фыдыфсымӕр, хистӕр ӕфсымӕр цы фынгыл бадой, уым ӕрбадынӕй лӕг ӕгад кӕны уыцы хистӕрты.
6. Нӕлгоймагӕн йӕ чызгимӕ хъазты кафын не’мбӕлы, у худинаг.
7. Искӕй агуывзӕмӕ цӕст дарын, карз нозтӕй тых кӕнын, чи цас ӕмӕ цы нуазы ууыл дзурын сты лӕг ӕфхӕрӕн, ӕнӕгъдау митӕ.
8. Цины фынгыл кӕнӕм кувгӕ, уадзӕм сидтытӕ ӕмӕ гаджидӕуттӕ. Рӕгъытӕ вӕййынц зианы фынгыл.
9. Хуыцаумӕ ӕртӕ хистӕры дӕр хъуамӕ кувой бӕгӕныйӕ. Карз нозтӕй кувын раст нӕу.
10.Хуыцаумӕ, йе сконд зӕдтӕ ӕмӕ дауджытӕм кувӕм лӕугӕйӕ, худаистӕй. Сидтытӕ ӕмӕ гаджидӕуттӕ ис нуазӕн бадгӕйӕ дӕр, хистӕры фӕндмӕ гӕсгӕ.
11.Чындзӕхсӕвы, чызгӕрвысты, куывды хистӕрты раз цы кувинаг ӕртӕ чъирийы ӕвӕрӕм, уыдон хъуамӕ уой конд хӕдзары, сӕрмагондӕй Хуыцауы номыл.
12.Цины фынгыл нӕй зианы ӕгъдӕуттӕ кӕнӕн: рухсаджы рӕгъ уадзӕн, фынгмӕ нозтӕй калгӕйӕ хойраг хӕлар кӕнӕн, лӕугӕйӕ зӕгъыны фӕстӕ бадгӕйӕ нуазӕн.
13.Не’мбӕлы нуазӕн, хай, хӕрӕнгӕрзтӕ галиу къухӕй дӕттын ӕмӕ исын.
14.Фынгыл не’мбӕлы тамако дымын, ӕнӕфсарм ныхас кӕнын.
15.Худинаг у цинмӕ нозтджынӕй бацӕуын, фынгӕй расыгӕй сыстын, дыууӕ хатты фынгыл ӕрбадын.
16.Хистӕры куывдыл, сидтыл, гаджидауыл не’мбӕлы бирӕ дзурын, уымӕй адӕмы раз дзырдарӕхстдзинад ӕвдисын.
17.Не’мбӕлы цины искӕмӕ цӕхгӕр дзурын, хыл кӕнын, ӕнӕуаг митӕ кӕнын.
18.Бинонтӕн худинаг у адӕмы куывдмӕ ӕрхонын ӕмӕ сӕ уым фынгтыл ӕхца ӕмбырд кӕнын. Кӕм цы ӕгъдау раттын хъӕуы, уый хъуамӕ алкӕмӕн йӕхи бар уа.
19.Ӕнӕгъдаудзинады фӕдыл цӕуынӕй, Ӕгъдау халджытӕн уайдзӕф ма кӕнынӕй, цӕстмӕ митӕ ӕмӕ цӕстмӕ ныхӕстӕй Ӕгъдауӕн цыбыр кӕнӕм йӕ цард. Алкæй хæс дæр у йæ хъахъхъæнын æмæ йæ сыгъдæгæй кæстæртæм дæттын.