Миләш чыпчыгын ничек куркытырга?
Миләш чыпчыгы (дрозд) берничә көндә зур агачны җимешсез калдыра ала. Алар аеруча бакча җиләге, ирга, чияне ярата. Бу кошлар үзләрен тыныч тота, сугышмыйлар, аларның зыян салуын агач селкенеп торудан гына чамалап була. Миләш чыпчыгы ерткыч кошлардан курка. Кайбер бакчачылар шуларның тавышын яздырып, бакчада уйната. Әмма тавыкларыгыз бар икән, бу киңәш туры килми, ул аларны да өркетәчәк.
Агачларга ерткыч кошка охшаган эшләнмәләр эләргә була. Иң җиңеле — ябалак сурәте яки аның күзе дә җитә. Кояшта ялтырап, күренеп торсын өчен, аларны иске дисктан ясагыз.