Өрөспүүбүлүкэ бибилэтиэкэлэригэр Оҕо төрөөбүт тылынан ааҕыытын көҕүлүүр кииннэр үлэлэрин салгыыллар.

Алтынньы ый көрдөрүүтүнэн, бары улуустарга уонна Дьокуускайга 400 киин аһылынна, мантан биэс киин эбээн, эбэҥки тылынан ааҕыыга Алдан, Өймөкөөн, Булуҥ, Кэбээйи улуустарыгар аһыллан үлэлииллэр.

Бу кииннэр саха тылын эрэ буолбакка, хотугу аҕыйах ахсааннаах норуоттар тылларын үөрэтиигэ улахан болҕомтону эмиэ уураллар. Оҕо төрөөбүт тылынан ааҕыытыгар, төрөөбүт тылын иҥэриниитигэр, төрүт култуураҕа сыһыаннаах араас хабааннаах тэрээһииннэри ыытан саҕалаатылар.

Ол курдук, Чурапчытааҕы «Төрөөбүт тыл биһигэ» кииҥҥэ «Эбэ ааҕар» дорҕоонноохтук ааҕыы аахсыйалара, «Төрөөбүт тыл ыллыгынан» оҕону саха норуотун үгэстэрин билиһиннэрэр дьарыктар, Уус Алданнааҕы «Сандаар» кииҥҥэ «Бииргэ ааҕабыт» дьиэ кэргэнинэн ааҕыы күрэҕэ; Томпотооҕу кииҥҥэ «Учимся говорить по-якутски!», «Культура народов Якутии» оҕону төрөөбүт тылынан ааҕыыга уонна култуурабытын кытта билиһиннэрии уруоктара, Өймөкөөннөөҕү кииҥҥэ «Оонньуубут, сайдабыт, элбэҕи билэбит» тэрээһин, Булуҥнааҕы «Хутар дюгурма» (Светлая тропинка) кииҥҥэ «Гудей дуниэ» эбэҥки норуотун фольклорун туһунан билиһиннэрии уруоктара; Алданнааҕы «Эвэды танкаллу» эбэҥки тылынан ааҕыы киинигэр «Туос тыылаах эбэнкилэр» кинигэ биһирэмэ о.д.а. араас хабааннаах тэрээһиннэр ыытыллаллар.

Сахабыт сирин олохтоохторо, кииннэр ыытар тэрээһиннэрин өйөөҥ, көхтөөхтүк кыттыҥ диэн ыҥырабыт.

Афанасий Ноев